नेपाली हास्यव्यङ्ग्य अनलाइन पत्रिका

म वर्षौदेखि
त्यो देउता भन्नेलाई
खोज्दै हिँडेको छु
र, त्यो मसँग डराएर भागिरहेको छ
मेरो अघि कहिल्यै देखा पर्दैन ऊ
यदि मसँग
उसको भेट भयो भने
भयङ्कर झगडा हुनेवाला छ हामीबीच
केही हिसाबहरू छन्
ऊसँग असुल गर्नु पर्ने,
केही मुद्दाहरू छन्
तुरुन्तै छिन्नु पर्ने
मलाई लोभ देखाएर,
केही क्षण हातैमा थमाइदिएर
मेरो सर्वस्व पसिनाको पाती खाएर
फेरि आफैँ हरेर लगेका
मेरा जीवनमा अमूल्य खुसीहरू
मैले ऊबाट खोसेर लिनु छ,
हो, उसले ‘चाराना’ दिएर ‘बाह्राना’ अशुलेको छ ।
तिनै हिसाबहरू तिर्न नसकेर
त्यो मेरो अघि देखा पर्दैन
त्यो मसँग भागिरहेको छ
हो, त्यो देउता भन्नेलाई मैले भेटेँ भने
पहिला व्यापक झगडा हुने छ
अनि मात्र अभिवादन आदान प्रदान हुनेछ ।

झापा, हाल : काठमाडौं