नेपाली हास्यव्यङ्ग्य अनलाइन पत्रिका

(दशैं विशेष २०७१)

यो दशैं भो दशा खर्चले दामले
के गरी टार्दछन् बोझ यो आमले
ज्यान धेरै गयो खोर रित्तो भयो
गोठ खाली भयो भग्न भित्तो भयो ।

खाइयो बेसरी नाचियो गाइयो
पेट रोगी भयो लाभ यो पाइयो
लोक जोगी हुने रीत यो चाड यो
कण्ठमै अड्किने दुष्ट यो हाड यो ।

खास यो मेल हो प्रीतको खेल हो
बासमा फकिर्ने जेट हो रेल हो
ती बचेरा सबै माउको काखमा
आउने गाउने बाउको काखमा ।

दूर भो जिन्दगी कर्मयोगी बनी
देस रित्तो भयो क्यानडा जर्मनी
कोइ जापानमा कोइ खाडी हरे !
लौ न पुस्ता नयाँ फूल जस्तै झरे ।

टाढिए पाखुरा छाडिए फाँट यी
खेत बाँझै भयो दुर्बलै आँट यी
जून घामै गए कृष्ण रामै गए
को रह्यो देशमा ? हेर आमै गए !

चितवन