नेपाली हास्यव्यङ्ग्य अनलाइन पत्रिका

काठमाडौं, मंसिर २५– भारतीय टीभी च्यानल ‘कलर’बाट प्रसारण हुने ‘कमेडी नाइट विथ कपिल’ नेपाली दर्शकमाझ पनि लोकप्रिय भैसकेको छ ।
भारतमा सबैभन्दा बढि हेरिने यो टेलिभिजन शोले नेपाली दर्शकको समेत आकर्षण बढाइरहेको बेला यस्तै प्रकृतिको नेपाली शो पनि प्रसारण हुँदैछ ।
मंसिर २६ गते बुधबारदेखि हिमालय टेलिभिजनमा साप्ताहिक रुपमा प्रसारण हुने ‘हास्य व्यंग्य केन्द्र’लाई हास्यव्यंग्य कलाकार मनोज गजुरेलले सञ्चालन गर्दै हुनुहुन्छ ।
‘उताबाट कपी होइन, हामीले आफ्नै मौलिक ढंग र स्वरुपले कार्यक्रम सञ्चालन गर्न लागेका हौं’ उज्यालो अनलाइनसितको कुराकानीमा गजुरेलले भन्नुभयो । नेपालको तराई र पहाडको संस्कृतिलाई झल्को दिने गरी तयार पारिएको मञ्चमा अरु हास्यव्यंग्य कलाकार र कवीहरुले पनि साथ दिने गजुरेलले जानकारी दिनुभयो ।
‘नेपालमा स्ट्याण्डअप कमेडीको खडेरी भैरहेको बेला केही नयाँ प्रस्तुति दिने उद्देश्यले कार्यक्रम निर्माण गरेका छौं’ गजुरेलले भन्नुभयो ।
त्रिवीर क्रिएसनको प्रस्तुति हास्य व्यंग्य केन्द्रलाई छोटकरीमा एचबीसी भनिएको छ । ‘मानिसको रगतमा आरबीसी र डब्लुबीसी भएजस्तै अर्को फ्याक्टर एचबीसी पनि आवश्यक पर्छ’ गजुरेलले भन्नुभयो, ‘एचबीसी अर्थात ह्युमर बल्ड सेल, मानिसको मस्तिष्कमा खुशी र मनमा आनन्द प्रवाह गर्न ह्युमर पनि आवश्यक पर्ने भएकाले यसलाई ध्यान दिँदै कार्यक्रम गर्न लागिएको हो ।’
एकसय भाग प्रसारण गर्ने लक्ष्य रहेकोमा २० भागको छायांकन सकिसकेको गजुरेलले जानकारी दिनुभयो । पुराना नहुने राजनीतिक घटनाक्रम र सामाजिक विषयवस्तु प्रस्तुतिमा समेटिएको छ । कलाकार र दर्शक खचिखचाउ हुने मञ्चको प्रस्तुतिले नयाँ स्वाद दिने गजुरेलको विश्वास छ ।
सुलसुले