नेपाली हास्यव्यङ्ग्य अनलाइन पत्रिका

महंगीले रोपेर
जनताको ढाड सेकाइएन
तोरी फुलेको देखाइएन
ग्वाँ पारी घुँडा टेकाइएन भने
के बजेट ल्याउनु
बजेट बजेट भनि
ओठ मुख मात्र सुकाउनु ।

करले घोपेर
व्यापारीको टाट पल्टाइएन
सिन्डीकेट लगाएर
दुई चार उद्योग घटाइएन
उद्योगधन्दा बन्द गराएर
रोजगारीको पेट कटाइएन भने
के को बजेट ल्याउनु
खाली बजेट बजेट भनि
नदुखेको टाउको मात्र दुखाउनु ।

विकासे बजेट फालेर
आफ्नो गाउँमा पारिएन
कमिसनको नाममा
दुई चार दाम झारिएन
जनताको मुखाँ माँड नपरे पनि
आफ्नो मुखमा जाँड पारिएन भने
के को बजेट ल्याउनु
खाली बजेट बजेट भनि
दश नङ्ग्रा मात्र ख्याउनु ।

नयाँ नीति हालेर
धनीलाई धन थपिएन
गरिब झन दबिएन
जनता सुकुम्बासी बनाई
आफूमाथि थपिएन भने
के को बजेट ल्याउनु
खाली बजेट बजेट भनि
मन्त्रालय मात्र धाउनु ।

वजेट ल्याउँदा
दुई नम्बरीलाई बचाइएन
महगी चर्काएर
बजारमा उधुम मचाइएन
कामै नगरी
तलब भत्ता पचाइएन भने
के को बजेट ल्याउनु
खाली बजेट बजेट भनि
के को मन्त्री मात्र हुन आउनु ।

दाङ, हाल काठमाडौ