नेपाली हास्यव्यङ्ग्य अनलाइन पत्रिका

आऊ आऊ मोदी आऊ
वर्षको दुई चार चोटी आऊ
प्लेनबाट मात्रै होइन
गाडी चढेर आऊ
गाउँ घरको बाटो बनाऊ ।

तिमी आउँदा यहाँको बाटो बन्छ
जनताको आँगनको माटो बन्छ
सरसफाइको मेला लाग्छ
थोरै भए नि राष्ट्रियता जाग्छ
गन्ध आउने गल्ली
बास्नादार बन्छन्
सबका सब क्या मोदी
वाह वाह भन्छन् ।

आऊ मोदी फेरि आऊ
हाम्रा नेतालाई सक्दो फकाऊ
भाषण गर सदनमा
हामी ताली बजाउने
वीरका सन्तान हामी
किन लजाउने ?

हामी सवको भाग्य
विधाता बनिदेऊ
हाम्रा नेताहरूलाई
तिमीहरू पनि मान्छे नै हौ भनिदेऊ ।

आऊ मोदी यता आऊ
नाफा खोज्दै व्यापार बढाऊ
हामी सुन दिएर नुन किनौँला
दुई छिमेकी वर्षौं मिलौँला
हामी सँगसँगै
नदी साटौँला
जनताको लागि ठूलो
काम भन्दै ढाँटौँला ।

हाल– स्यादुल, धादिङ