नेपाली हास्यव्यङ्ग्य अनलाइन पत्रिका

लड, लड साँढेहरू खुब लड
दम्भ र हठको गर्तमा गढ
सिङ भाँच्चिने गरी लड
खुर खुस्किने गरी लड
अझै फुँकार गर
अझै हुँकार गर
लड, लड साँढेहरू खुब लड ।

लड, लड साँढेहरू खुब लड
अगम्य गहिरो धापमा गढ
तुलफूल माडिने गरी लड
बोट बिरुवा फाँडिने गरी लड
थात थलो मच्किने गरी लड
बार भित्ता पच्किने गरी लड
कोलाहल हुने गरी लड
हलाहल हुने गरी लड
लड, लड साँढेहरू खुब लड ।

लड, लड साँढेहरू खुब लड
जोरीपारी हाँस्ने गरी लड
साख इज्जत मास्ने गरी लड
आलाकाँचा किचिने गरी लड
बाच्छा, बाच्छी मिचिने गरी लड
सिङ भाँच्चिने गरी लड
खुर खुस्किने गरी लड
लड, लड साँढेहरू खुब लड ।
काठमाडौं