नेपाली हास्यव्यङ्ग्य अनलाइन पत्रिका

जब भुइँचालो गयो
मेरो घर पूरै भत्कियो
सानो छोरा घरभित्रै पुरियो
अस्ति मात्र किनेको भैंसी पनि मर्यो
अन्नपात माटोमा सराबरी भयो
न बस्न बास छ
न खान गाँस छ
न त लाउन कपास छ
खुला आकाश मुनि रात बिताउँछु
म बिचल्लीमा परेको छु हजुर !
मेरो सर्वस्व गयो ।
म दुःखीको कोही छैन
म टुलुटुलु घरको भग्नावशेष हेरेर रोइरहेछु
आज छैठौँ दिन हो भुइँचालोले मेरो बिल्लिवाठ पारेको
न कोही आएको छ
न त कसैले सहयोग दिएको छ
हजुर आउनु भयो
मेरो बिचल्ली देख्नु भयो
तर खोई सरकार आएको ?
कहाँ छ सरकार ?
कहाँ छन् भोट माग्न आउने नेताहरू ?
कहाँ गए हामीलाई जुलुसमा लिएर जाने कार्यकर्ताहरू ?
हजुर ! यो देशमा सरकार छ ?
यतिबेला मलाई मेरो आत्माले यहि भन्छ कि
यो देशमा गरीबको निम्ति कुनै सरकार छैन
छ भने पनि
यो जस्तो बेकामको सरकार कहीँ छैन ।
बैशाख १७, २०७२