नेपाली हास्यव्यङ्ग्य अनलाइन पत्रिका

सुरभि साहित्य प्रतिष्ठानको सातौँ वार्षिक साधारण सभा तथा ५९ औँ आख्यान वाचन कार्यक्रम २०७२ श्रावण १६ गते शनिबार बेँसी गाउँमा सम्पन्न भयो । प्रतिष्ठानका अध्यक्षको अध्यक्षतामा सम्पन्न कार्यक्रमका प्रमुख अतिथि नेपाल प्रज्ञा प्रतिष्ठानका कुलपति गङ्गाप्रसाद उप्रेती हुनुहुन्थ्यो भने नरेन्द्रराज पौडेल विशेष अतिथि हुुनुहुन्थ्यो । त्यसै गरी कलाधर काफ्ले, वेदमणि घिमिरे, गोपाल बराल, युवराज मैनाली र कुमार श्रेष्ठ अतिथि रहनुभएको थियो ।

प्रतिष्ठानका उपाध्यक्ष परशुराम पराशरको स्वागत मन्तव्यबाट सुरु भएको यस कार्यक्रममा वर्षभरि वाचित कथाहरू मध्येबाट उत्कृष्ट कथाका कथाकार प्रकाश बस्नेत ‘गफाडी’लाई सुरभि–वेदमणि आख्यान वाचन पुरस्कार २०७१ प्रदान गरिएको थियो ।

कार्यक्रममा रेहान खान, रामचन्द्र दाहाल, लक्ष्मी एडी, रञ्जना पराजुली, कुसुम शर्मा, कलाधर काफ्ले, प्रकाश बस्नेत ‘गफाडी’, नरेन्द्रराज पौडेलले कथा वाचन गर्नुभयो भने युवराज मैनालीले व्यङ्ग्य निबन्ध वाचन गर्नुभएको थियो । सचिव अच्युत घिमिरेले सञ्चालन गरेको यस कार्यक्रममा प्रमुख अतिथि गङ्गाप्रसाद उप्रेतीले प्रतिष्ठानको कार्यको सराहना गर्दै सकेसम्म सहयोग गर्ने वचन दिनुभएको थियो ।

नियमित कार्यक्रमभन्दा अगाडि दिउँसो ११ बजे सुरु भएको वार्षिक साधारण सभा प्रतिष्ठानका अध्यक्ष बाजुराम पौडेलको अध्यक्षता एवम् वरिष्ठ आख्यानकार विजय चालिसेको प्रमुख आतिथ्यमा सम्पन्न भएकोे थियो । अध्यक्षको वार्षिक प्रतिवेदन तथा कोषाध्यक्षको आयव्ययको प्रतिवेदन पारित गरिएको उक्त सभामा विधानमा केही संशोधनसमेत गरिएको थियो । यस कार्यक्रममा वेदमणि घिमिरे, युवराज मैनाली, गोपाल बराल, वसन्त रिजाल, लक्ष्मण श्रेष्ठ, कुमार श्रेष्ठ अतिथि हुनुहुन्थ्यो ।