नेपाली हास्यव्यङ्ग्य अनलाइन पत्रिका

हे अगस्त्य मुनि, तहाँ उप्रान्त नेपाल भूमण्डलका नरेशलाई नागार्जुनको रमणीय उपवनमा पठाउँदा भए । लामो समयसम्म शासन गर्दा–गर्दा दिक्क भयाका नरेश पनि आरामले रहँदा भए ।
यता, जड्डलका घुमन्तेहरू र गाउँका रमन्तेहरू भोकाएका गिद्ध झैँ सिंहदरबारको कुर्सीमा झम्टिँदा भए । कुर्सीका लागि तँछाड–मछाड गर्दा भए । के भनेर त्यहाँ गएको भन्ने मूल लक्ष्यबाट विमुख भई आपसमा हानाहान गर्दा भए । हे अगस्त्य मुनि, तहाँ उप्रान्त तिनीहरूमा भनाभन भयो, हानाहान भयो, कहिले खिर्की हाने, कहिले छिर्की हाने । त्यसमा छिर्की हान्न सिपालु ख्याउटे गोर्खालीले कुर्सी हत्याई बाँकी सबैलाई लत्याउँदो भयो । त्यसपछि बाँकी जन्मै उसको खुट्टो तान्नमै तल्लीन हुँदा भए र जनताका सारा काम त्यत्तिकै रहँदा भए ।
हे अगस्त्य मुनि, तहाँ उप्रान्त जनताले राताराता आँखा पारी हानथाप गर्ने र कुर्सीकै खेलमा लागेका सबै जड्डली र गाम्लेहरूलाई छानीछानी संहार गर्दा भए । तदुपरान्त मात्र नेपाल मण्डलमा चाहे जस्तो शान्ति र संविधान बन्दो भयो ।