नेपाली हास्यव्यङ्ग्य अनलाइन पत्रिका

तेल बेच्न बसेको
आयल निगमसँग
तेल छैन
अपराधी थुन्छु भन्छ
नेपाल प्रहरी
तर बबुरासँग
एउटा राम्रो जेल छैन
भड्खारोमा परोस्
साला पदक
हाम्रो खेलकुद परिषदसँग
एउटै पनि खेल छैन ।

बिहान–बेलुकै ढिंडो निल्दा
घाँटीमा चरो करायो
भन्छन् हुम्ली, जुम्लीहरु
चामलको के आस गर्नु
विचरा खाद्यसँस्थानसँग
एउटा सिंगै सेल छैन
सधैं भेटै पिच्छे हात त मिलाउँछन्–पच्चिस दल
तर किन यिन्मा मेल छैन !

सिमकार्ड बाँड्छ टेलीकम
नेटवर्क बाँड्दैन
विदेशिन पासपोर्ट देउ भन्दा
परराष्ट्रले पासपोर्ट बेच्दैन
साला विद्युत प्राधिकरणको कुरै नगर
उ हिउँद/वर्खा सधैं
पानी भए पनि–नभए पनि
सम्साँझैं लाईन काट्छ
कृषि बैकले लाजै नमानी किसानको खेत खान्छ ।

जहाज उडाउनु पर्ने
वायु सेवा निगमसँग–जहाज छैन
अख्तियार र विशेष अदालतसँग
शीरदेखि पाउसम्म लाज छैन
धारामा हावा छिराएर
मिटर चढाउने खाने पानी संस्थान
उसँग नैतिक सोंच छैन
साला ढल र सडक विभाग
घाम ताप्छन र भत्ता पचाउँछन्
औषधि र डाक्टर विनाका
सरकारी अस्पतालले के को मान्छे बचाउँछन् !

जात्रामाथि जात्रा थप्छन्
संसदमा छ सय एक मठाधिसहरू
न चलाउन हुने, न बोलाउन हुने
यो देशका पत्रकार र न्याधिसहरू
आधुनिकताको नाउँमा
दिउँसै नाङ्गिने मिसहरू
आदि–इत्यादी सबै महान हुन्
यो मुलुकमा जनता नै हुन् ठिसहरू…. ।
नारायणस्थान, बागलुङ