नेपाली हास्यव्यङ्ग्य अनलाइन पत्रिका

१.हुनुसम्म भो

बिजुली अनुसार नाच्दै जाउलो जुटाउँदै
टुप्पी खिउन्जेल हिँड्दै पैतालो फुटाउँदै
अरूका भरमा बाँच्दा हुनुसम्म बर्बाद भो
छिमेकका स्वार्थ पाल्दै डुब्यौँ थाप्लो समाउँदै ।

२. उतैको मिठो

भात पनि उतैको मिठो बात पनि उतैको मिठो
जात पनि उतैको मिठो हात पनि उतैको मिठो
दिल्ली गई गर्दा त झन् मिठो झुटो हल्लीखल्ली
साला नेपालको के मिठो, लात पनि उतैको मिठो ।

३. खोइ के भनौँ

मानवीय सङ्कट भने पनि बिजुली(चुला उतैका बिके
इन्धन सङ्कट भने पनि काला–इन्धन उतैका बिके
खोइ स्वाभिमानी राष्ट्रवादले कुन नदीमा हाम फाल्यो
अधिकार(लडाइँ भने पनि विद्रोही नेता भातैमा बिके ।

४. खोज्छौ विशेष सुविधा !

देशका लागि गरेका के छौ र खोज्छौ विशेष सुविधा
जनताका लागि गरेकै छौ के र रोज्छौ विशेष सुविधा
द्वन्द्व्, भ्रष्टाचार, बेइमानीले रसातलमा झारेको देशमा
शान्ति, समृद्धि केही नगरी भोग्ने किन विशेष सुविधा ।

५. स्वाहा हुने भो

भूकम्प र नाकाबन्दीले हाडछाला बनेको देशमा
फेरि दाह्रानङ्ग्रा गाड्न कसिए ब्वाँसाका भेषमा
लूटका अनेक प्रपञ्चले पुगेन क्यार द्रव्यपिशाचलाई
बचेखुचेको अस्तित्व स्वाहा हुने भो सुविधा विशेषमा ।

काठमाडौं