नेपाली हास्यव्यङ्ग्य अनलाइन पत्रिका

बिचरा जनता

जनता मरिरहेछन् तर नेता मन्त्रीमा बढुवा भइरहेछन्
जनता भोकाइरहेछन् तर नेता हाँसी भोज खाइरहेछन्
जनताको रगतको भोज खानेहरू हिजो नि आज नि
जनता चिसो चुलोसँगै मृत्युका दिन कुरेर रोइरहेछन ।

नेपालीको भाग्य

नेपालीलाई कसैले खिर दिँदैन सकेसम्म पिर नै दिन्छ
एउटाले गरेन अर्कोको आश गरे झन् झिर रोपिदिन्छ
सरकार जति फेरियून् न पाउने त खालि सास्ती मात्र
नेपालीलाई कसैले सुविधा दिँदैन सधैँ दुबिधा नै दिन्छ ।

मोडियो

गणतन्त्रमा उन्नति लौ ! पशु मन्त्रालय फोडियो
अति बाठा प्रधानमन्त्री ! पशुमै पो नाम जोडियो
काग धेरै बाठो भई आची खाने काम सुरु गर्छ रे
गणतन्त्रमा हाम्रा मन्त्रीको मति पशुतर्फै पो मोडियो ।

थरीथरी जवानी

काठमाडौँको चिसो पानी पिउँदापिउँदै गएछ जवानी
यो ठाउँको जाडो हेर्दाहेर्दै हुन्छ पूरै जिउको रौँ ठाडो
लोडसेडिङ बढ्यो ग्यास नि नाका छेक्दा सब सड्यो
बुढा मन्त्रीनेताको बढ्यो ब्याङ्क ब्यालेन्स र जवानी ।

काठमाडौं