नेपाली हास्यव्यङ्ग्य अनलाइन पत्रिका

दुष्चक्र

यो सरकार गिर्छ । बिहान गिर्छ, दिउँसो गिर्छ, बेलुकी गिर्छ । दिनरात गिरिरहन्छ । तस्करको पाउमा लम्पसार परेर गिर्छ । कालाबजारियाको गोडा छेउछाउमा पनि सरकार गिर्छ । मुठ्ठी बटार्दै ‘हाम्रो माग पूरा गर’ भन्ने जत्था आयो भने ठाउँको ठाउँ गिरिहाल्छ । छरछिमेकबाट कोही आउनै हुन्न, पुर्लुक्कै गिर्छ । अलि दिनपछि बोर्डिङ स्कुलको शुल्क बढाउन खोज्छ, त्यसबेला सरकार लम्पसार परेर गिर्छ । कुनै आईएनजीओले यसो नगर भन्यो भने गिर्छ, कुनै एनजीओले त्यसो नगर भन्यो भने पनि गिर्छ । जुनसुकै बेला जहाँसुकै सरकार गिरिरहन्छ तैपनि टिकिरहन्छ । जनता जो छन् ! अरूका अगाडि गिरे पनि जनतासामु सरकार गिर्दैन ।

महँगी घटाइदेऊ अभाव हटाइदेऊ भनेर जनता खबरदारी गर्छन्, अहँ, सरकार फिटिक्कै गिर्दैन । व्यापारीले सुविधा देऊ भन्छन् सरकार तत्क्षण गिर्छ तर जनतासँग गिर्दै गिर्दैन । सरकार भन्या जनताको हो, अरूसँग गोडामै गिरे पनि जनतासँग नगिरेसम्म सरकार टिकिरहन्छ । एकथरी नेता कहिल्यै नउठ्ने गरी अब यो सरकार गिर्छ भन्दैछन् । गिरेको सरकारलाई उठ्न नदिने दाउ तिनले गरेका हुन् । यस्तो कामलाई हाम्रोमा ‘राजनीति’ भन्छन् क्यार ! यो सरकार उठ्न नसक्ने गरी गिर्यो भने अर्काे सरकार बन्नेछ । अर्काे सरकार पनि यो सरकारजसरी नै गिरिरहने छ ।

फनफनी घुम्नेलाई चक्र भनिन्छ, यसरी गिरिरहने, टिकिरहने र एकदिन उठ्नै नसक्ने गरी गिर्ने र गिर्नकै लागि नयाँ टोली आउने कामलाई चाहिँ दुष्चक्र भनिन्छ ।

न्यायाधीश चयन, ठीक

– सांसद, पार्टीको चुनाव हारेका या बेरोजगार नेतालाई न्यायाधीश बनाइदिने । पार्टीका मान्छेले न्याय दिँदैनन् भन्ने दाबी गलत हो । न्यायालयले ‘अन्याय’ गरेर जेल हालेको मानिसलाई पार्टीले न्याय दिएको उदाहरण चाहियो ? कांग्रेस महाधिवेशन हेरिहाल्नु भो, त्यसभन्दा काइदाको उदाहरण अरू कुन चाहियो ?

– न्यायाधीश र सांसद दुवैलाई ‘माननीय’ भन्छन् । कि माननीय भन्न भएन, भन्ने हो भने जहाँसुकै मान्ने व्यवस्था गरेर माननीयको कदर गरौँ । अहा ! यताका माननीय उता, उताका माननीय यता !

– मन्त्रिपरिषदमा न्यायाधीश बस्न मिल्ने, अदालतमा सांसद बस्न किन नमिल्ने ? सांसदको पद न्यायाधीशले खान हुन्छ भने सांसद पनि न्यायाधीश बन्न मिल्छ ।

– झन् जनअदालत चलाएका अनुभवीहरूलाई न्यायाधीश बनाए गजबै हुन्छ । पद नपाएर छटपटिएका धेरै छन्, न्यायाधीश बनाएर तिनको उद्दार गर्नु आफैँमा न्याय होइन र ?

– पार्टीमा नलागेकालाई न्यायाधीश नबनाउने र ? कतै नलागेका मानिस गाउँतिर पाइन्छन् रे, न्यायाधीश बन्ने औकात भएकाहरू पार्टीकै पछाडिको ढोकाबाट फुत्त आएका हुन्छन् रे ! नबनाई सुख ? बरू पार्टी सदस्यता नभएकालाई चाहिँ न्यायाधीश बन्न नदिने व्यवस्था गरौँ, न्यायाधीश पद खाने झगडाको बीऊ निमिट्यान्न पारौँ ।

ल्हारक्याल बयान

प्रहरी : गोली कहाँबाट आयो ?
ल्हारक्याल : साथीले राख्न दियो । ओम शान्ति !
प्रहरी : साथीले दियो भन्दैमा राख्न हुन्छ त ?
ल्हारक्याल : सेवा नै धर्म हो, साथीको सेवा गरेको हुँ । ओम शान्ति !
प्रहरी : यसरी शान्ति मात्र जपिरहनेले गोली राख्न हुन्छ त ?
ल्हारक्याल : मैले नराखेको भए त्यो गोली अरू कसैले प्रयोग गथ्र्यो । त्यसैले लकरमा शान्तिसँग राखिदिएँ । गोली, बन्दुक, साथी सबैलाई शान्ति भयो । ओम शान्ति !
प्रहरी : यो गोलीले के गर्ने उद्देश्य थियो ?
ल्हारक्याल : शान्तिबाहेक मेरो कुनै उद्देश्य छैन । ओम शान्ति !
प्रहरी : त्यसो भनेर पाइँदैन, सबै कुरा भन्नुपर्छ !
ल्हारक्याल : म भिक्षु हुँ, भिक्षुका रूपमा मात्र बयान दिन्छु । ओम शान्ति !
प्रहरी : गोली राख्ने, राजनीति गर्ने, राज्यकोषबाट तलब खाने अनि हाम्रो फन्दामा परेपछि चाहिँ भिक्षु हुँ भन्ने ?
ल्हारक्याल : मैले तलब लिएको छैन । अरूले लिए तलब हुन्छ, हामीले लिए भिक्षा हुन्छ । ओम शान्ति !
प्रहरी : अनि, गोलीचाहिँ के नि ?
ल्हारक्याल : त्यो गोली पनि भिक्षा हो । भिक्षामा गोली दिए त म के गरौँ ? गोली राख्यो भनेर गाली दिँदैछन्, त्यसलाई पनि भिक्षा नै मानेको छु । ओम शान्ति !
त्यसपछि एउटा कागज तेस्र्याउँदै प्रहरी भन्छ : ‘ल, अब यो कागजमा सही गर्नूस्, यो तपाईंको बयान हो ।’ ल्हारक्याल मुसुक्क हाँस्छन्, कलम समाउँछन् र सही गर्नुपर्ने ठाउँमा लेख्छन्, ‘ओम शान्ति !’

तन्त्र, मन्त्र र यन्त्र

नामै लोकतन्त्र ! यसभित्र अनेक तन्त्र, मन्त्र र यन्त्र हुन्छन् । विराट पेट्रोलियमले पेट्रोल बेच्न थालेपछि एकसाथ अनेक तन्त्र र मन्त्र सक्रिय भए । विराटको पेट्रोलियम कारोबारको सेरोफेरोमा सल्बलाएका तन्त्रहरू स्

अर्थतन्त्र स् विराट पेट्रोलियम कम्पनीले पेट्रोल बेच्न थाल्नु अर्थतन्त्र हो ।
मन्त्र स् १ सय ३० रुपियाँ लिटरमा पेट्रोल बेच्न आयल निगमबाट अनुमति हात पार्नु मन्त्रको कमाल हो ।
लोकतन्त्र स् बढी मूल्यमा पेट्रोल बेचेकामा विरोध हुनु लोकतन्त्र हो ।
महामन्त्र स् मन्त्र र लोकतन्त्रको चरणपछि पेट्रोलको मूल्य स्वात्तै घटाइयो । यसो हुनु महामन्त्र हो ।
षड्यन्त्र स् महामन्त्रपछि षड्यन्त्रको चरण सुरु हुन्छ । मन्त्रभन्दा गुप्त हुन्छ यो ।
अनुमानतन्त्र स् लोकतन्त्रको असाध्यै महत्वपूर्ण तत्व अनुमानतन्त्र हो । यो तन्त्रले भन्छ, विराटसँगको मिलेमतो मन्त्रले वशीभूत भएको नेपाल आयल निगमले पेट्रोलियमको कृत्रिम अभाव जारी राख्छ । त्यसपछि विराटले भकाभक पेट्रोल बेच्न थाल्छ । उसको पेट्रोल छ्याप्छ्याप्ती भएपछि पुनस् मन्त्रको चरण सुरु हुन्छ र झ्याप्पै मूल्य बढाइन्छ ।

तपाईंलाई लोकतन्त्रका यी तत्वमध्ये सबैभन्दा प्रभावशाली कुन लाग्यो ?

नेपाल, चैत्र १२, २०७२