नेपाली हास्यव्यङ्ग्य अनलाइन पत्रिका

उकुस मुकुस भएर
शहर बसेको बेला
दुइचार दिन भए पनि
घुम्न गाउँ गइयो
शहरमा आलु खाए पनि
गाउँमा पेडाको धाक लाउँदै
हिरो भइयो ।

धुलो धुँवाले
शहरमा निस्सासिएको बेला
दुई चार दिन भए पनि
शुद्ध हावापानी खाइयो
देखावटी शहरको माया भन्दा
गाउँमा पवित्र माया पाइयो ।

शहरका परीहरू
दिनमा जून जस्ता
रातमा सितारा जस्ता
बिहान मुहार धुँदा
कोतर्ने दारा जस्ता
गाउँका कान्छीहरू
बिहानमा झर्ना जस्ता
दिनमा फूल जस्ता
रातमा तारा जस्ता ।

शहरमा गर्ने काम छैन
काम भए पनि दाम छैन
दाम भए पनि नाम छैन
तर गाउँमा जाँगर हुनेलाई
काम छ दाम छ
दाम हुनेलाई ठूलै नाम छ
त्यसैले शहरमा
भ्यागुतो झै थुप्रिनु भन्दा
उफ्रिँदै गाउँ जाऊँ
धरहरा झैं कुप्रिनु भन्दा
केही गरौं आफ्नै ठाउँ ।

काठमाडौं