नेपाली हास्यव्यङ्ग्य अनलाइन पत्रिका

१. खतरनाक मान्छे

थाहा छ र भन्न सकिन्छ—
बाघले झम्टिन्छ, सर्पले डस्छ
कुक्कुरले टोक्छ, भालुले चिथोर्छ
तर भन्नै सकिन्न– मान्छेले के के गर्छ गर्छ ।

२. भेद

सुनको साङ्लो लगाउँदा गहना हुन्छ
फलामको त्यही साङ्लो हतकडी हुन्छ
साङ्लो त आखिर साङ्लै न हो–
भेद नबुझेर पो गडबडी हुन्छ
आजको नेपाल ।

३. कारण

बाजेले मुखियाहरूको तमसुकका कारण ठाउँ छाडे
बाबुले बजियाहरूको बन्दुकका कारण गाउँ छाडे
फेरिएका छन् पात्रहरू, कथा भने उस्तै छ
नातिहरूले आज कसका कर्तुतका कारण देश छाडे ?
एउटा लेण्डुप दोर्जेले ‘मर्ज’ गरौं’ भन्यो
अर्को मिरजाफरले ‘गोजी भरौं’ भन्यो
सुन्दर शान्त नेपाल आज
कस्ता कस्ता कुपुत्रहरूको क्रीडास्थल बन्यो !

४. एउटा सूचना

नेता र व्यापारीहरू सधैं तपाईंको सेवामा तत्पर छन्
प्रहरी, कर्मचारी सबै तपाईंकै सेवामा अग्रसर छन्
अलि सतर्क भएर हिंड्नु होला–
कसले, कतिखेर, कहाँनेर तपाईंको सेवा गर्छन्ग गर्छन् !

६. कविता लेखेर के गर्ने ?

कुनै ऐना छैन कि क्याहो, शिर झुकेको हेर्ने
कुनै डाक्टर छैन कि क्याहो, मन दुखेको हेर्ने
शिर झुकेकोझुक्यै छ, मन दुखेकोदुख्यै–
मैले कविता लेखेर के गर्ने ?

‘अभिव्यक्ति’ १६९ बाट