विश्व विनोदविद्यार्थी अपहरण अभियान
हामी सबैको इच्छा, अनिवार्य निशुल्क आधारभूत शिक्षा– भन्ने नाराका साथ दारा देखाएर बिद्यार्थी भर्ना अभियान तपाई हाम्रो घर दैलोमा टेकिसक्यो {{read_more}} तर मुतिसक्यो दैलो देख्यो भन्ने उखानको अर्को रुप यहाँ खोज्नु पर्दैन होला । मलाई त यो भर्ना अभियान अभियानमा सिमित रहेर अभिनय बन्छ कि जस्तो पो लागिरहेको छ त गाँठे । कारण धुमधडाकसँग विद्यार्थीलाई पन्चै बाजा बजाएर, टिका र माला लगाएर विद्यालयमा भर्ना गरे पनि के भो र हाम्रा माड्सापका पुरानै ढर्राले विद्यार्थीको पढाईमा छर्रा हालेको पक्कै हो । अझ निजी विद्यालयले यो नारालाई कुल्चेर विद्यार्थी अपहरण अभियान पो चलाएका रहेछन् । वाह, राज्यको नीति बिरुद्धका निजी विद्यालयको गज्जबको महानता अझ निजी विद्यालयका संचालक नै गाउँपालिका र नगरपालिकाका महामहिम बनिदिएपछि यो अपहरण अभियान निजी विद्यालयले टेवा दिइरहेको छ ।
हिजो मेरो श्रीमानले मेरा तीन जना छोरा छोरीलाई सरकारी विद्यालयमै भर्ना गर्छु भनेर बाहिर निस्कनु भएको थियो तर बेलुका आउँदा सदरमुकामको यौटा निजी विद्यालयमा भर्ना पो गरेर आउनु भएछ । अनि उहाँलाई किन यस्तो गर्नु भएको हो भनेर प्रश्नको बर्षा गर्दा उहाँले भन्नु भयो– फलाने बोर्डिङमा ३ जना बिद्यार्थी लगेमा १ जना सित्तैमा पढाउन पाइने रहेछ, तर अहिले बच्चा भर्ना गरेको बोर्डिङमा चाहिँ ३ बच्चा भएमा २ जना लाई सित्तैमा पढाउने रे, २ जना बच्चा मात्र लगे पनि १ जना बच्चालाई सित्तैमा पढाउने रे, अनि हाम्रा ३ मा २ जना सित्तैमा पढ्न पाउने भएपछि मैले त बोर्डिङमा हाल्दिए है बच्चालाई …. । वाह, बच्चा त बीच बाटो बाटै अपहरणमा परेछन् । यो अपहरण निजीले गर्न कत्ति सिपालु है ? तपाईले ख्याल गर्नु भएकै होला, एक बोर्डिङ पढ्न गएको विद्यार्थी अर्को बोर्डिङका संचालकले नाना भाँतिका कुरा गरेर आफ्नोमा तानेर लैजाने र अपहरण शैली मच्चाउने तरिका पनि यही भर्ना अभियानको बेला चल्ने गर्दछ । निजी विद्यालयले बार्षिकोत्सवमा यति जना नयाँ विद्यार्थी भर्ना भए भनेको सुन्ने हो भने म मोरीको बुझाईमा यति जना विद्यार्थी अपहरण गरिएर भर्ना भए भन्ने पो बुझ्छु त मैले । अनि सरकारी विद्यालयको बार्षिकोत्सवमा यति जना विद्यार्थी यो साल घटेभन्दा यति जना विद्यार्थी अपहरणमा परेर निजीले खुइँक्याएछन् भने बुझ्छु, के मेरो बुझाई गलत नै हो त ?
बाबुनानीलाई राम्ररी सिकाउने, बिकाउने र श्रम बजारमा टिकाउने जनशक्ति निर्माण मेरो मुलुकमा भएको छैन । नत्र भने किन विदेशमा हाम्रा विद्यार्थी पढ्न जान्थे हँ ? अझ सस्तो प्रतिस्पर्धामा उत्रेर निजी विद्यालयले नयाँ विद्यार्थीलाई पोषाक सित्तैमा दिने अभियान चलाएको पाइन्छ । सरस्वती पूजाको दिनदेखि अक्षरारम्भको च्याँखे थापेर बाबुनानीलाई भर्ना अभियान अगावै अपहरणकारी शैली अग्रिम बुकिङ गरेर पढाई रहेको पाइन्छ यहाँ । यसरी सस्तो र तल्लो निच प्रतिस्पर्धामा होमिने निजी विद्यालयलाई कारबाही गर्ने कस्ले ? आखिर गाउँपालिकाका वा नगरपालिकाका प्रमुख, उप प्रमुख वा कुनै न कुनै सदस्य नै निजी विद्यालयका संचालक छन् । अझ उता सरकारी विद्यालयमा पनि ढिस्काना पार्टीका जिल्ला सचिव नै संचालक बनेका पनि छन् । ती जिल्ला सचिवले व्यबस्थापन गरेको सरकारी विद्यालय पक्कै राम्रो हुनु पर्ने हो नि हैन र ? किनकी मेरो अनुमानमा ति जिल्लास्तरका नेता त पछि संसद बनेर देश बिकासको खाका कोर्ने हुन् । आखिर गाउँको जाबो स्कुलको खाका कोर्न नसक्नेले देशको नाका के कोर्न सक्लान् है ?
यसरी विद्यालयमा राजनीतिको नाउँमा लाजनीतिलाई प्रश्रय दिएर सरकारी विद्यालयका विद्यार्थीलाई निजीमा भाग्न बाध्य बनाउने अनि निजीलाई अपहरण गर्न सिकाउने पक्षको पनि राम्रै लेखा जोखा राख्ने चित्रगुप्त कहाँ होलान् र खै ? अझ आफ्ना बाबुनानी निजीमा पढाएर सरकारी विद्यालयको बिद्यार्थी भर्ना अभियानमा सरिक हुने बडा माड्सापको चर्तिकला पनि हेर्न लायकको हुन्छ । अझ बिहान भर क्याम्पसमा पढाएर थाकेर आएका राजनीतिक कार्यकर्ताहरू सरकारी विद्यालयको कुर्सीमा १० बजे देखि ४ बजेसम्म बुढो साँढे थाकेको झैं लत्रङ्ग परेर झुलेर थकाई मार्न पुगेको बेला हाम्रा नयाँ भर्ना भएका बाबु नानीले ति माड्साप बाट के पढ्ने हँ ? झन् ४ बज्न नपाई ट्युसन पढाउन निस्कने र ४ बजे भित्रै विद्यालय हातामै ट्युसन पढाएर विद्याभन्दा लक्ष्मी ठूलो भन्ने निबन्धको व्यवहारिक प्रयोग यी महामहिम ठूलाठालु माड्सापबाट भएको पाईन्छ । कतै तपाईले बाबुनानी भर्ना गर्ने सरकारी बिद्यालयमा यस्ता प्रबृत्ति भएका मानिसका चंगुल त छैन ? एक पटक सोच्ने कि ? तर सरकारी विद्यालयमा विद्यार्थी भर्ना अभियानमा सहभागी हुनुस् है नकि अपहरण अभियानमा हैन । तारेमाम् ।
