नेपाली हास्यव्यङ्ग्य अनलाइन पत्रिका

(गीत)
आँखा,नझिम्क्याउ सान्नानी म ता ब्रह्मचारी
मलाई,नबोलाउ सान्नानी असुराको घारी ।

मेरो जातै भाले प-यो तिमी प-यौ पोथी
तिमी देख्ता रातो हुन्छ मेरो कानको लोती
अनि,लत्रक्क त्यसै गल्छन् मेरा नवै नारी । आँखा …

यस्ती राम्री तरुनीलाई लान मन त लाग्छ
आफ्नो हालत सम्झंदैमा मायाँ पिर्ती भाग्छ
अनि,त्यसैले बस्छु नानी एक्लै निहुँ पारी । आँखा …

तलब ल्याउँछु डेरा भारै तिर्न धौधौ पर्छ
केले किन्नु लाली पाउडर केको पाकेट खर्च
मैले, काहाँ पाउनु कुर्ता सुरुवाल केले किन्ने सारी । आँखा …

मेरो डेरा गल्लीभित्र भत्केको छ भरेङ
कठबारको सानो कोठा चुइँ चुइँ गर्ने पलङ
मेरा,छिमेकी कान थापी बस्छन् वारिपारि । आँखा …

टेबुलमाथि फाइलैको सिम्भुजत्रो ढिस्को
टेबुलमुनि फुट्टी छैन केले जाने डिस्को
भैगो,खरानी घस्छु अब पाल्छु लामा दाह्री । आँखा …

मेरा जुत्ता आँ आँ गर्ने तिमीलाई चाहिने हाइ हिल
तिमी खोज्छ्यौ पजेरो ता आफ्नो छैन साइकिल
अनि,पन्युँले हान्ल्यौ भोलि यत्रो पोको पारी । आँखा …

मायाँ पिर्ती लाउने भए गरौं यौटा सल्ला
अंश लेर आउने भए विचार गर्नु पर्ला
लौ है,नत्र ता जोवन जाला उसै डाँडापारि । आँखा …

कमलपोखरी, काठमाडौं