नेपाली हास्यव्यङ्ग्य अनलाइन पत्रिका

(शालिनी छन्द)
लण्ठ्याङ् लण्ठ्याङ् हल्लिंदै मात्र आएँ
केही भन्नै पर्छ आदेश पाएँ
के भन्ने हो जिल्ल पर्दैछु मित्र
दोधारैमा तर्क छन् चित्तभित्र ।

जे देखेको भन्नु केही हुँदैन
जे खोजेको पाइँदै पाइँदैन
मात्रै हाँसी खिस्स बत्तीस दन्त
बाजा बज्छन् साथ जाँदैछु जन्त ।

मुर्कट्टाको नाच नाङ्गो म हेर्छु
आहा भन्दै मात्र तारीफ गर्छु
यस्तो राम्रो हुन्न भन्नै भएन
राम्रो सुन्ने चाहनै जन्मिएन ।

भत्काएकै बेश हत्या अहा ! छ
मायाँ भन्ने चीज खै ता कहाँ छ ?
सिस्नोलाई भन्नु पर्ने गुलाब
जो पापी ऊ हुन्छ हाम्रो जनाब ।

यस्तै पर्दा भित्र बोली फुटेन
के लेख्ने हो शव्द जुट्तै जुटेन
भैगो, यै हो ठान्नुहोस् उच्च काव्य
ठोकौं ताली भो सभा भव्य भव्य ।

कमलपोखरी, काठमाडौं