नेपाली हास्यव्यङ्ग्य अनलाइन पत्रिका

थाहै थिएन म मरी सकेछु, गनायो र लाशै र पो चाल पाएँ
बलै घिसारी लगी घाट पोलें, उल्टो अनौठो अवगाल पाएँ

घोडा लात हानी फुटाल्दिन्छ शिर, अर्को शिकारी खसाल्दिन्छ भिर
म फर्केर आएँ उठी बल्लतल्ल, किन फेर बाँचिस् यो सवाल पाएँ

बन्यो दैव घाती, किन दुख्छ छाती, नमाती बसेको म हाँसेर एक्लै
चोरिस् भोक भन्दै, पिइस् प्यास भन्दै, खुबै दण्ड चर्को यो बबाल पाएँ

खुदै जिन्दगीले लखेट्यो मलाई, मिलेको छ यस्तै सधैंको भलाइ
डढाए खरानी बनाए रमाई, मिल्यो स्वाद यस्तै छ कमाल पाएँ

फेरिस् शास भन्दै ठटाए सकेको, हेरिस् नेत्र भन्दै फुटाए चलाई
मिल्यो जिन्दगानी मजाको कहानी, जो फर्केर आयो नयाँ साल पाएँ ।

०००
२०७९/११/०९ बिहान
अचम, तनहुँ