नेपाली हास्यव्यङ्ग्य अनलाइन पत्रिका

भाेजराज रेग्मी मुखाले :

‘थोत्रो राजा फाल्दियौ’ भन्थे, आफैं लाउँदै छन् हलीहरू
हलो अड्काएर गोरु कुट्दै पप् गाउँदै छन् हलीहरू ।

वर्षौंदेखि भोकतीर्खा आँसु पिउँदै बाँच्नेहरूलाई,
मनको लड्डु पो घिउसित खुवाउँदै छन् हलीहरू ।

आकर्षक घोषणापत्रको सुटबुट पहिरिएर
अकर्मण्यको सुके लुतो कन्याउँदै छन् हलीहरू ।

जुन जोगी आए पनि लौ, कानै चिरिएका पो रहेछन्,
दिनदिनै बिग्रिएर उग्रै गन्हाउँदै छन् हलीहरू ।

शहीदहरूका सपनालाई शिशासरी फुटाएर
हाँडीगाउँको जात्रा सधैं मनाउँदै छन् हलीहरू ।

०००
पेप्सीकाेला, भक्तपुर