नेपाली हास्यव्यङ्ग्य अनलाइन पत्रिका

दिव्य गिरी :

अनुहारमा पीडाको डाम छ हजुरको
सहरमा खुवै बदनाम छ हजुरको ।

पौपैपापको घडा भरिएको छ अतीत
हिजोआज खुवै चारधाम छ हजुरको ।

मीठो बोल्नुहुन्छ बोलीमा विप घोल्नुहुन्छ
भित्रभित्रै भने खुवै छलछाम छ हजुरको ।

बाहिर साधुको भेष, भित्री मन ब्वांसाको
पहेंलो पिताम्बरमा रामनाम छ हजुरको ।

सधैंभरि सबै दिन उस्तै हुँदैन भन्छन्
आजकल ओझेल परेको घाम छ हजुरको ।

घट्छ रक्सीको प्याला तर घट्दैन पीर व्यथा
उदास उदास बितेको हरेक ‘साम’ छ हजुरको ।

उहिले उहिले यस्तो पिउने बानी थिएन
हरेक साँझ देख्छु हातमा ‘जाम’ छ हजुरको ।

नेता, गुन्डा, कालोबजारी, मन्त्री सबै तपाई नै
भन्नुस् त हिजोआज के काम छ हजुरको ।

चुँडिएको चप्पल लगाएर हिँड्थ्यौ गाउँमा
नेता बनेपछि पजेरोमा घुमघाम छ हजुरको ।

कुर्सी तपाईंकै साथ, शक्ति तपाईंकै हात
त्यसैको आडमा छोरो हराम छ हजुरको ।

पैसा कमाएपछि घरकी जेठी बिर्सिनु भो
रखौटी भनूँ कि कान्छीसँग धुमधाम छ हजुरको ।

शक्ति र सत्ताको दुरुपयोग निकै गर्नु भो
भ्रष्टाचारीको सूचीमा नाम छ हजुरको ।

०००
टीकाथली-५, ललितपुर
मधुपर्क-१०४ (२०६४)