नेपाली हास्यव्यङ्ग्य अनलाइन पत्रिका

१.
गोलमाल छ गोज्याङ्ग्रे तेरो जीवन
पोल्टाभरी पीडा बोकी काट्छस् रिवन
बाठो बन्छस् आफैँ सधैँ सद्देहरू रुवाई
आफैँ पाल्छस् भतुवालाई बिगौती खुवाई ।

२.
आयो आयो भन्थे सबै हेर्न गएँ म नि
देखेँ एउटा भुसतिघ्रे हन्तकाली थ्यो नि
आफ्नै बखान गर्दै थियो टाँडमाथि चढी
भुक्न थाले कुकुरहरू चढ्यो पछि गाडी ।

३.
कति राम्रो गति लियो विकासले हेर
मोटर चल्ने सडकमा साइकल भाँचियो हेर
पोखरीमा गाडी गुड्छ सडकमा खोला
यति राम्रो विकास छ अन्त कहाँ होला ।

उदयपुर