नेपाली हास्यव्यङ्ग्य अनलाइन पत्रिका

१
हावासरि वेग मार्दै बहन निकै गाह्रो रहेछ
सधैं यथावत भएर रहन निकै गाह्रो रहेछ
कसैको नजरबाट तल झरेपछि थाहा भो
तिरस्कारको घाउ सहन निकै गाह्रो रहेछ ।

२
कुराकानीले मात्र जिन्दगी चल्छ र
कसैको श्रापले सगरमाथा ढल्छ र
हद हुन्छ महाशय, कुरा गर्ने पनि-
गाँजाको बोटमा कतै मेवा फल्छ र ?

३.
कुरामाथि कुरा थप्न माहिर हुनुहुन्छ उहाँ
मीठा मीठा मन्त्र जप्न माहिर हुनुहुन्छ उहाँ
न्याय अन्यायको छिनोफानो गफ मात्र हो,
हक अधिकार हडप्न माहिर हुनुहुन्छ उहाँ ।

४
सयौं युवाका सपनाहरू तुहिएको देख्दैन सरकार
र, कर्णालीमा जडीबुटी कुहिएको देख्दैन सरकार
तर पनि देशलाई यस्तो उस्तो बनाउँछु भन्छ ऊ
कठै ! झुपडीको छानो चुहिएको देख्दैन सरकार ।

काठमाडौं