नेपाली हास्यव्यङ्ग्य अनलाइन पत्रिका

हिजोआज खुबै चिच्याएर
बोइलर कुखुरा बास्न थाले ।
मै कराएर बिहान भयो भन्ने
सुन्दा मान्छे हाँस्न थाले ।।१।।

हेर आमा यो बाँसको टुप्पो
म चढेपछि लतक्कै नुहियो ।
मैले पत्याएँ बाबु खुट्टा देखेरै
फिस्टाले थिच्यो फतक्कै कुहियो ।।२।।

वनको रक्षा गर्ने राजा हामी हौँ
भनी खोक्ने बुढा स्यालको चाला ।
बुझ्ने जन्तुले नङ्ग्याउलान् कि
ओढेको थोत्रो बाघको छाला ।।३।।

अब म पनि अनुशासनमै बस्छु
भन्छ गधा भेट्दा लौरा र चोट ।
बुद्धि दिने उसकै मालिकले भिर्छ
धुन लिएको लुकिचोरी दौरा र कोट ।।४।।

बेहुलो सिँगारे ऊँटको बूढो छोरो
पाका गधाले नाच्तै गीत गाएका ।
दुलहाको रूप र गाउनेको स्वर
तारिफ गर्दै दुवैले खुबै प्रीत लाएका ।।५।।

०००
कपन, काठमाडौं