नेपाली हास्यव्यङ्ग्य अनलाइन पत्रिका

१
मान्छेहरू कुकुर पाल्छन्, नेता चम्चा पाल्दा रैछन्
यिनका मालिकलाई हेरे, यिनै भुक्न थाल्दा रैछन्
यिनीहरू ठान्दा होलान्, देश आफ्नै बाउको बिर्ता
कठैबरा आफ्नो औकात, झ्याप्पै देखाई हाल्दा रैछन् ।

२
सर्प अनि भरेङ्ग रैछ, राजनीतिको खेला हजुर
कहिले पर्छ लामो भरेङ्ग, कहिले सर्प फेला हजुर
मौका पर्दा सर्प न्याउरी, एकै घाटको पानी पिउँछन्
प्यास नबुझे निहुँ खोज्छन्, जुनसुकै बेला हजुर ।

३
सेतो हात्ती फाल्यौं भन्दै, काला हात्तीहरू भुक्दा
लाज लाग्छ स्वार्थी बन्दै, वर्ग दुस्मनसँग झुक्दा
एक हुन सक्ने रैछ, नदी तटका दुई किनारा
आफ्नै मुहार फोहर हुन्छ, आकाशतिर फर्की थुक्दा ।

०००
चितवन