नेपाली हास्यव्यङ्ग्य अनलाइन पत्रिका

चिरञ्जीवी दाहाल :

१.
हरायो मुखको कान्ति, त्यो जवानी कता गयो
जीवन आज रुखबाट, ओर्लिएको लता भयो
कुरो खान्न परिवार, पत्याउदैन समाजले
यो बुढो केही बुझ्दैन, भनिदिन्छन् जता गयो ।

२.
ठूलो सिंहदरबारमा, बुढै देश चलाउँछन्
गाउँका सिँहदरबारले, यता मुटु जलाउँछन्
धर्म भित्र पस्यो बाढी, मिसायो त्यै समुन्द्रमा
देउताका गहना चोर्न, मठ मन्दिर ढलाउँछन् ।

३.
लाख लिइ छोरासँग, बाउलाई हजार देखाउँछन्
वृद्धवृद्धा सम्मान भन्दै, भत्ता लिन बोलाउँछन्
शरणार्थी बनाउँछन्, पैसा र सुनको खातिर
पार्टी नामको अगेनामा, बासी रोटी सेकाउँछन् ।

४.
लुट्नलाई रात चाहिन्न, भ्रष्टाचार के कुरा भयो
छैन ध्यान उन्नतीमा, मुख मात्र छुरा भयो
न सुन्छन् माटो बोलेको, देश रोए यी हाँस्दछन्
आफ्नै सात पुस्ता उकास्छु,भन्थे लक्ष पुरा भयो ।

०००
चितवन