नेपाली हास्यव्यङ्ग्य अनलाइन पत्रिका

अमर सन्तति :

१.
मन्त्रीको खेती गर्ने मात्रै हो कि संघीयता !
कुर्सीतिर दागा धर्ने पात्रै हो कि संघीयता !
देशै खोक्रो बनाउँदै हँसाएर पराइलाई ,
जनताको खुसी हर्ने जात्रै हो कि संघीयता !

२.
जितेपछि कता ओझेल पर्छन् यिनीहरू
सोझ्याएर दुनो झोली भर्छन् यिनीहरू
चुनावमा म्याउम्याउ,पछि हुन्छन् बाघ
खोलो तर्यो लौरो बिर्स्यो गर्छन् यिनीहरू ।

३.
बोकाले नै जोत्न बल लाउँदैछ, यो के अचम्म
हुट्टिट्याउँले सगर थाम्न गल लाउँदैछ, यो के अचम्म
बाँचिरहे यो धर्तीमा के के देखिने रहेछ गाँठे !
पुच्छरले कुकुर हल्लाउँदै छ, यो के अचम्म !

०००
भक्तपुर ।