नेपाली हास्यव्यङ्ग्य अनलाइन पत्रिका

होम सुवेदी :

१.
कोही आर्यघाटमा लान कात्रो किन्दै छन्
कोही यसको चरित्र बल्लतल्ल चिन्दै छन्
कतै उछिनपाछिन छ यसबाट फाइदा लुट्न
उता कोही भने गणतन्त्र खान उसिन्दै छन् ॥

२.
कोही फूलको बिरुवा हो भनेर पानी हाल्दै छन्
कोही सुन नै ठानेर तौलन उचाल्दै छन्
अस्पष्टता भएपछि के गरून् त विचारहरू
यस्तैमा कोही भने राँगो हो कि गोरु हो भनेर निउरिएर नियाल्दै छन् ॥

३.
परिवर्तन हुनु पनि के भयो र चुहुने टिन छँदै छन्
बङ्करेका दिन फिरे पनि गरिबलाई दुखका दिन छँदै छन्
हतपती परिवर्तन नहुँदो रहेछ कान्छा
पहिले जो थिए आहिले पनि उनै तीन छँदै छन् ॥

४.
उनीहरूले (उनीहरूले क्या उनीहरूले) सुन मानेका छन्
झोले र भरौटेले ठगी खान पाएकोमा गुन मानेका छन्
यसलाई भित्र्याउन जसले सत्रहज्जारको वलि दिएका थिए
तिनका आफन्तले भने खुन मानेका छन् ॥

५.
अब यसलाई बैतर्नी तारौँ होला
यसको जुठो बारौँ होला
प्रेत अपगतिमा पर्छ भन्ने विश्वास छ
अब यसको मोक्षका लागि पिण्ड बटारौँ होला ।

०००
झापा