नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
हात समाउन आउनु भयो एक्लै जङ्घार तरेपछि
के काम छ कोसेली काईँयो कपाल जम्मै झरेपछि
यति दूरदर्शी हुनु हुन्छ कि हाम्रा भाग्य निर्माताहरू
अस्पताल बनाउने भन्नु हुन्छ रोगले मान्छे मरेपछि ।

२.
पोल्ने घामझैँ बन्नु हुन्छ या छहारी मर्जी हजुरकै
गैरीखेत बन्नु हुन्छ या सुख्खा टारी मर्जी हजुरकै
नामसारी गरेको हुँ मनको जायजेथा राजीखुशीले
फूलबारी बनाउने हो कि चिहानघारी मर्जी हजुरकै ।

३.
जरा सुकाएर टुप्पाबाट पलाउन खोज्नेहरू सङ्ग सकिन्न
पानीमा भिजाएर दियो जलाउन खोज्नेहरू सङ्ग सकिन्न
जस्तो बिउ रोप्यो त्यस्तै उब्जनी दिने हो यो धर्तिले पनि
अभिमान रोपेर प्रीति फलाउन खोज्नेहरू सङ्ग सकिन्न ।

०००
भैरहवा