नेपाली हास्यव्यङ्ग्य अनलाइन पत्रिका

नवराज कार्की :

१.
यता त्रिभुवन विश्वविद्यालयमा ताला लागेको छ
उता त्रिभुवन विमानस्थलमा मेला लागेको छ
जता हेर्यो उतै किन अँध्यारो छ अचेल ?
घाम पनि खै किन हो ? अबेला लागेको छ ।

२.
अहा ! मान्छे त त्यो पनि साह्रै मजाको रै”छ
पाएका ठाउँमा त त्यसले पनि , साह्रै मजाले बजा”को रै”छ !
बाक्लाे, ठूलो, न्यानो खास्टो ओढेको हुनाले
यस्तो जाडोमा पनि त्यै खास्टोले बचाको रै”छ !

३.
कुनै बेला प्रहरीले छाम्दा छाम्दै पनि ऊ जोगिएको थियो
कुनै बेला अख्तियारले डाम्दा डाम्दै पनि ऊ जोगिएको थियो
लिन जानेको, दिन जानेको, सत्ताले छानेको मान्छे हो नि ऊ
कुनै बेला डरले थरथर काम्दा काम्दै पनि ऊ जोगिएको थियो ।

४.
“गाडी” सत्ताको प्रतीक हो, जलाउनु पर्छ !
“गाडी” सत्ताको प्रतीक हो, जोगाउनु पर्छ !
गाडी बन्दैन नेपालमा, मान्छे त बन्छ नि !
मान्छे बनाउने उमेरका जति छन्, तिनलाई धपाउनु पर्छ !!

५.
“असल” पनि तपाईं नै हुनोस्
“सफल” पनि तपाईं नै हुनोस्
म एउटा अपवाद हूँ, अपवाद भैरहन्छु
के के हुनु छ सबै, तपाई नै हुनोस् ।

०००
हाल- अमेरिका