नेपाली हास्यव्यङ्ग्य अनलाइन पत्रिका

लक्ष्मण नेवटिया :

१.
भोको पेट भर्न मात्र वृतान्तले पुग्दैन,
भोको पेट भर्न मात्र वेदान्तले पुग्दैन,
भोकोपेटले मचाउछ समाजमा उत्पात,
भोको पेट भर्न मात्र सिद्धान्तले पुग्दैन ।

२.
अवरोध हटाउनु पनि आफैमा श्रमदान हो,
हौसला बढाउनु पनि आफैमा रक्तदान हो,
दान नगरे पनि महादानी बन्न सक्छौं हामी,
जुठो नछाड्नु पनि आफैँमा अन्नदान हो ।

३.
अहोरात्र पिउँदै रहनु मात्र जिन्दगी होइन,
संसारमा खिइँदै रहनु मात्र जिन्दगी होइन,
जिन्दगी खोज्दाखोज्दै हराएको छु स्वयं नै,
संसारमा जिउँदै रहनु मात्र जिन्दगी होइन ।

४.
भोकोलाई भोजनको कहानी सुनाएर के हुन्छ,
मात्र बोलीवचनले मेहरबानी देखाएर के हुन्छ,
आगोलाई मखमलबाट छोप्ने प्रयास बन्द गर्नुस्,
माथि शेरवानी भित्र परेशानी लुकाएर के हुन्छ ।

०००
विराटनगर