नेपाली हास्यव्यङ्ग्य अनलाइन पत्रिका

वसन्त अनुभव :

१.
खेलाडी फेरबदल हुन्छन् खेल उस्तै हो,
कैदी परिवर्तन भैरहन्छन् जेल उस्तै हो,
नत खुसी पोख्नु छ नत दुःख मनाउनु छ,
सत्तामा जो भए पनि जालझेल उस्तै हो ।

२.
बुढो गोरू थला परे जोत्न बुढै गोरु आउँछ ।
कृषक खाली खेत जोत्न बुढो मात्र पठाउँछ ।
अनाडी छ भनि जिम्मेवारीबाट पन्छाइरहँदा,
ढुक्कसँग बहरले जोत्न भन कहिले पाउँछ ।

३.
कतै कुकुर त कतै हुँडारले कराएर मार्‍यो ।
नकली सिंह बन्दै बिरालोले डराएर मार्‍यो ।
विचरा ती मृग हरिणहरू डरले भागाभाग,
अवसरवादी स्याँलले भिरमा छराएर मार्‍यो ।

०००
घोराही १४, दाङ