रमेश समर्थनचार ठोक्तक
खै, के दोष हलोलाई गोररु नै बाङ्गिएपछि खै, के दोष अरूलाई मूली नै नाङ्गिएपछि त्यस वृक्षको असामयिक मृत्यु निश्चित छ हाँगाहाँगामा परजीवी ऐजेरू झ्याङ्गिएपछि ।
रमेश समर्थन :
१.
यो त्यो देश हो जहाँ दैत्यलाई पनि देवता मानिन्छ
बेइमानहरूको समूहबाट अब्वल बेइमान छानिन्छ
विद्यार्थी तुइनबाट खस्छन् आमाहरू बाटामै मर्छन्
तर मन्दिर जानका लागि भने केबुलकार तानिन्छ ।
२.
केटाकेटी खेल्न पाउँदैनन् अचेल आँगनमा गट्टाहरू
बुढाहरू पिँढीमा बसेर गफिन पाउन्नन् गरेर ठट्टाहरू
रोकिदिने छेकिदिने कोही नभएपछि यो देशलाई
मसानघाट बनाएर वीभत्स नृत्य गर्दै छन् मुर्कट्टाहरू ।
३.
खै, के दोष हलोलाई गोररु नै बाङ्गिएपछि
खै, के दोष अरूलाई मूली नै नाङ्गिएपछि
त्यस वृक्षको असामयिक मृत्यु निश्चित छ
हाँगाहाँगामा परजीवी ऐजेरू झ्याङ्गिएपछि ।
४.
मालिकले सोच्दैन श्रमिकको पेटमा अन्न गयो कि गएन
म भोको छु भन्दै श्रमिक मालिकलाई भन्न गयो कि गएन
श्रमिकको पेट होइन, आफ्नो खेतको पिर हुन्छ मालिकलाई
ऊ त सोच्छ, आज कामदार जोत्न वा खन्न गयो कि गएन ।
०००
रुपन्देही
प्रकाशाेन्मुख मुक्तकसङ्ग्रह ‘बदनाम आँचल’ (२०८२)
Subscribe
Login
0 Comments
Oldest
