नेपाली हास्यव्यङ्ग्य अनलाइन पत्रिका

ज्ञानुवाकर पाैडेल

१.
मनै त हो काँडालाई पनि सुन्दर फूल देख्न खोज्ने
सम्झेर सधैं निष्ठुरीलाई पीरतिको गीत लेख्न खोज्ने
क-कसलाई दोष दिनु खै को कोसँग गुनासो पोख्नु –
समाजनै त रहेछ हाम्रो मिलनको बाटो छेक्न खोज्ने !

२.
नदीले छाडिनै सके अचेल स्वच्छ रुपले बग्न यहाँ,
मानिस पनि व्यस्त छन् एक-अर्कालाई ठग्न यहाँ;
के लाग्छ गए-गुज्रेका नेताहरूको बाहुल्य भैदिएपछि-
कोही देखिएन ईमान्दार देश-निर्माणमा संलग्न यहाँ !

३.
कुन्नि किन व्यर्थै यहाँ मान्छेको मन फाट्दो रहेछ !
किन कसैले केही भन्दैमा यहा दुःख लाग्दो रहेछ !!
पहिले पहिले त थिएन यहाँ यस्तो खराब परिवेश –
किन कोही त्यसैपनि अरुको कुरा काट्दो रहेछ !

०००