नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
कसले भर्छ प्राण यो जीवन चलाउँछ होला
शान्त मनभित्र आगो कसले लगाउँछ होला
अरुथोकको आगो त पानीले निभाउँथ्यो तर
आरिसको आगो कुन वस्तुले निभाउँछ होला ?

२.
तिमीले जस्तो ठान्छौ सबैले त्यस्तै ठान्दिनु पर्ने
तिमीले जस्तो जान्यौ सबैले दुरुस्तै जान्दिनु पर्ने
कस्तो संस्कृति निर्माण गर्दैछौ ए हनुमानहरू हो
तिम्रो मालिकलाई दुनियाँले भगवान मान्दिनु पर्ने ।

३.
गर्धन नदिनु र झुक्यो भन्दैमा पाउ नदिनु
बेइमानलाई बाध्यताको कुनै जनाउ नदिनु
कखरा जिन्दगीका यसरी पढाउनुहुन्थ्यो बा
भाउ खोज्नेलाई झुक्किएर पनि भाउ नदिनु ।

४.
फलाम त पग्लिन्छ जिन्दगी यो कठोर नठान्नु
निकास प्रत्येक कुराको हुन्छ घनघोर नठान्नु
लड्नु, जित्ने भनेकै लड्नेले हो बा भन्नुहुन्थ्यो
युद्ध मैदानमा आफूलाई कत्ति कमजोर नठान्नु ।

०००
भैरहवा