नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
तीन र तीनको योग कसैगरि तीन गर्न सकिन्न
चिन्दै नचिनी मनमन्दिरमा आसिन गर्न सकिन्न
हेर्दै जा बोल्दै नबोल तँ मुख नखोली पर्खी बस
बोक्रो छामेर फलको स्वाद यकिन गर्न सकिन्न ।

२.
अरुलाई जाँच्दा जाँच्दै स्वयंलाई जाँच्नै बिर्सियोस्
आकाश नियाल्दा बाटाका काँडा भाँच्नै बिर्सियोस्
भविष्यको चिन्तामा यसरी पनि नहराउनु जिन्दगी
भोलीको कल्पनामा आजको दिन बाँच्नै बिर्सियोस् ।

३.
गुड्डी हाँक्न, खुब ललकार्न त सबैलाई आउँछ
उठाउन पो मुश्किल झार्न त सबैलाई आउँछ
बलेको आगोमा हात सेक्दा के कमाल भन्छौ
बनाउन हो कठिन बिगार्न त सबैलाई आउँछ ।

४.
कुनै वस्तु सारेझैं यताउता सार्न पनि मिल्दैन
जित्न पनि मिल्दैन र सजिलै हार्न पनि मिल्दैन
बिना युद्ध कब्जा जमाउने मनको मामिला हो
के के हुन्छ मैदानमा चित्र उतार्न पनि मिल्दैन ।

०००
भैरहवा