नेपाली हास्यव्यङ्ग्य अनलाइन पत्रिका

रमेश समर्थन :

१.
छिद्रहरू जस्तासुकै होऊन्, धैर्यको धागाले सिउन नछोड
अमरत्वको अमृत पिउनेले जीवनको जहर पिउन नछोड
हामी त तन्नेरीबाट बुढा भयौँ, तन्नेरी बुढा होलान् नहोलान्‌
मर्नु त एक दिन छँदै छ तर मर्नुभन्दा पहिले जिउन नछोड ।

२.
कृत्रिम जिन्दगी गणितीय मापनले बाँचेकाहरू
आफ्नो दैनिकी यान्त्रिक सन्तुलनले बाँचेकाहरू
अरूलाई मारेर आफू मात्र बाँच्न खोज्छन् यहाँ
अर्कैले जोगाइराखेको अक्सिजनले बाँचेकाहरू ।

३.
सुयोग्य सन्तान जन्माउने उनीहरू महान् हुन्‌
जसले तिनको सम्मान गरेनन् ती नादान हुन्‌
बाआमालाई गाउँमै छोडेर आफू सहर पसेपछि
छोराले लेख्यो, ‘बाआमा त धर्तीका भगवान् हुन् ।’

४
अरूलाई माथि चढाउँछु भन्नु आफैँलाई लडाउनु हो
अरूको आगो निभाउन खोज्नु आफैँलाई जलाउनु हो
कसैले पनि कसैलाई सधैँभरि खुसी राख्न सक्दै सक्दैन
सबैलाई खुसी पार्छु भन्नु त आफैँलाई बलि चढाउनु हो ।

०००
रूपन्देही