नेपाली हास्यव्यङ्ग्य अनलाइन पत्रिका

रमेश समर्थन :

१.
समयले हाहाकारी सङ्गीत बजाउन त बाँकी नै छ
परीक्षकले चुनौतीको प्रश्न बनाउन त बाँकी नै छ
साहसको डोरी अलि बलियोसित बाटेर बस् समर्थन
जीवनमा अझै दुःखको घडी आउन त बाँकी नै छ ।

२.
जीवनलाई जीवनामृत मानेर पिउन खोज्दा
मक्किएका पलहरूलाई रफु गरेर सिउन खोज्दा
‘जा समर्थन, बाँच् आफ्नो जिन्दगी’ भनेन जिन्दगीले
जीवनलाई फगत् जीवनजस्तै बनाएर जिउन खोज्दा ।

३.
दिउँसै अँध्यारो पार्छन् र उज्यालालाई रुवाउँछन्‌
यी ती जनावर हुन् जो कान्जीहाउसमा सुहाउँछन्‌
यी बहुरूपियाहरूको अनुहारमा भर नपर्नुस् महोदय
पहिले खुन बगाउँछन् अनि गोहीका आँसु चुहाउँछन् ।

४.
हरेक करतुतको हिसाब राखेको छु
हरेक सवालको जवाब राखेको छु
तिमीसित ढुङ्गा छ, ढुङ्गैले हानौला
मैले भने हान्नलाई गुलाब राखेको छु ।

०००
रूपन्देही