नेपाली हास्यव्यङ्ग्य अनलाइन पत्रिका

चिन्नुपर्ने सबै चिनियो, छिन्नुपर्ने कुरो छिनियो, किन्नुपर्ने सबै किनियो । छोराको बे गर्नु पर्ने भोजभतेर खानलाई चम्चा चाहिन्छ । म किनेर ल्याउँछु है भन्दै बजारतिर लागेँ । ठूलो पसलमा गएर साहुजी चम्चा दिनु न भनेको- कुन दिउँ भने । खै देखाउनुस् त कस्ता कस्ता छन् ?

ए भाइ उहाँलाई चम्चा देखाइदेउ भनेर एउटा कामदारलाई अह्राए अनि चम्चालाई यसरी चिनाउन थाले ।

चम्चा नं १ – यो जातको चम्चा बजार भरी छ्यासछ्यास्ती छन् । वडादेखि बडासम्म, गाउँदेखि सहर, पाठशाला, पाकशाला, यतादेखि उता, नेतादेखि त्यता, डाँकादेखि नाका, दिउँसो होस् या राती, हाकिमदेखि पिउन, टेबुलदेखि केबुल, रेलदेखि सेल अनि तेलसम्मको दाना मुखमा पुर्‍याउने गर्छ । यो निम्नस्तरको चम्चा हो ।

चम्चा नं २ – यो चम्चा बजारमा त्यति पाइन्न, हेर्दा सोझो सोझो देखिन्छ । यो हरेक कार्यालयको अगाडि बस्छ । यो चम्चाको विशेषता भनेको सुनलाई नुन अनि गुनलाई घुन बनाउनु हो । बाटोदेखि माटो, प्लेनदेखि ट्रेन, साथै डाक्टरदेखि मास्टरसम्मको जिम्मेवारी यसकै हुन्छ । कहिले कहिले अन्तर्राष्ट्रिय सेवा पनि दिन्छ चाइनाबाट इन्डिया, इन्डियाबाट चिण्डिया हेर्छ । यसको अर्को विशेषता भनेको दानालाई नाना हुँदै छानाबाट खानासम्म पुर्‍याउँछ अनि दाना नपचेर छेरौटी लागे पाईखाना हुँदै भाइखानासम्म यसको साथ हुन्छ । यो मध्यमस्तरको चम्चा हो ।

चम्चा नं ३ – यो चम्चा राष्ट्रिय चम्चा हो । मन्त्रीदेखि पिउन, प्रदेशदेखि मधेस साथै विदेशसम्म पनि यसको हात हुन्छ । किल्ला हुँदै जिल्ला, दारीदेखि सारी, खोला हुँदै झोला, पुलदेखि झुल, अनि पालदेखि कपाल, कालसाल यसको जिम्मा हुन्छ । यसको विशेषता भनेको कहिले घाममा पुगेर माम अनि दाम ल्याउनुका साथै रुखमा पुगेर सुख बोकेर आउँछ । ओलीदेखि बोली, गोली अनि झोली यसको अधिकारमा पर्छ । शहरीदेखि प्रहरी, खोरदेखि चोर, मठदेखि हठसम्म यसले कब्जा गर्छ । कहिले नाङ्गो कहिले बाङ्गो बाटो हुँदै यसले दाना सप्लाई गर्छ । यो उचो अनि छुच्चो स्तरको चम्चा हो ।

यसरी थकाई नै लाग्नेगरी उसले फर्मायो । भाइ यो गिलास चम्चा पसल हो कि चम्चे पसल, एक पटक बोर्ड हेरेर आउनुस् ।

बोर्डमा लेखिएको रहेछ- चुनावी चम्चे पसल ।

०००
हेटौंडा