बद्रीप्रसाद दाहाल ‘भस्मासुर’ओर्ल क्वै राजनेता ?
भाते छाते, नव अमिरले, गर्न सक्दैन राज । भोगी सोखी, दलपति हुँदा, कोष रित्तो छ आज ॥ हाम्रो राष्ट्रै, असफल हुने, देख्न थाल्यौँ तमासा । हामी भन्छौ, नवमिसनमा ओर्ल क्वै राजनेता ॥
बद्रीप्रसाद दाहाल :
हेर्यौँ झन्नै त्रिदशतक नै, देशको लोकतन्त्र ।
रोगी ढोँगी निरस अगुवा,चाहने एकतन्त्र ॥
मात्रै सत्ता सयर यिनको, जल्पना कल्पना भो ।
आफ्नै नाता अनुचर बने, देश बर्बादमा गो ॥१॥
बाझ्ने जुध्ने जन भ्रम छरी, देश ठग्ने र चुस्ने ।
सोझा हामी, विकल जनता मात्र धेरै चिमोट्ने ॥
नारा छर्दै, धनपति बने, नक्कली दुष्ट जेता ।
हामी भन्छौ ‘नवभिजन’मा, ओर्ल क्वै राजनेता ॥२॥
भाते छाते, नव अमिरले, गर्न सक्दैन राज ।
भोगी सोखी, दलपति हुँदा, कोष रित्तो छ आज ॥
हाम्रो राष्ट्रै, असफल हुने, देख्न थाल्यौँ तमासा ।
हामी भन्छौ, नवमिसनमा ओर्ल क्वै राजनेता ॥३॥
आफ्ना आस्था, युगयुग बचून्, मान सम्मानसाथ ।
यात्रा भर्छौँ, अविचलित भै, एक हुन् पादहात ।
फुट्ने लुट्ने, मनमुटु ढली बन्न सक्छौँ विजेता ।
भन्छौँ हामी जनजन मिली, ओर्ल क्वै राजनेता ॥४॥
०००
धादिङ ।
