नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

धेरैको पसिना खोसी, झोसी उद्दण्ड-क्रान्तिमा ।
बलिदान मिटाएर, लाग्यो संपत्ति क्रान्तिमा ॥१॥

इमानी जति बेमानी, अभिमानी छ नायक ।
भाट-चाप्लुसका भीड, बोकेको खल-नायक ॥२॥

शक्तिको आडमा ढाड, सेकियो पृष्ठभूमिको ।
क्षमता-प्रतिमा टोकी, चम्चा-चाकर रोजियो ॥३॥

जहाँ पालिसका जिब्रा, ‘जी’ ‘हजुरी’ नचाउँछन् ।
शक्ति पाएर ‘बुख्याचा’चम्चाभित्रै हराउँछन् ॥४॥

लात हानिन्छ मातृत्व, भ्रातृत्व छ उपेक्षित ।
शक्तिको-मात ‘बुख्याचा’ मत्त-उन्मत्त-तेजित ॥५॥

चम्चा चाकरीका गाना, सुनाई शक्ति-माझमा ।
बुख्याचा ओठका भक्ति, भित्रै देख्दछ दर्शन ॥६॥

खुराफात सबै बात, चम्चा शक्ति घुमाउँछ ।
बुख्याचा भ्रम पालेर, इमानी चैं रुवाउँछ ॥७॥

धन्य चम्चा ! महाचम्चा सहचम्चा ! तँ धन्य छस् ।
‘बुख्याचा’ जनता बिर्सी, अधर्म कति गर्दछस्? ॥८॥

प्रशस्ति स्तुति मीठा छन्, नमीठा गुरु-दर्शन ।
चम्चाकै आड पाएर, ‘बुख्याचा’ गर्छ गर्जन ॥ ९॥

०००
डिबडिबे (२०६०)