नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

पुराना वाद मासेर, नयाँ वाद सजाउँछौँ ।
प्लेटो अरस्तु ताछेर, व्यास गान्धी कजाउँछौँ ॥
सुकरात भए जीर्ण, माओ अजीर्ण भैसके ।
लम्पसार नयाँ वाद, जन्मदा अरु गैसके ॥१॥

शङ्कराचार्य फिक्का छन्, फिक्का चाणक्य लेलिन ।
मजेम्दार र गोन्जालो, थोत्रिए मार्क्स-स्टालिन ॥
लम्पसार नयाँ दृष्टि, सृष्टि गर्छ विकासको ।
हाम्रै फ्यूजननै आज, नव-वाद प्रकाश भो ॥२॥

जल जङ्गल वा भूमि, सुरम्य ताल सम्पदा ।
प्रभुका गिद्ध-आँखामा, सधैँ अस्थिर चञ्चला ॥
प्रबुध्दका सबै भेला, सत्य सुझाव फालिए ।
इपिजी नाममात्रै भो, रद्दीमै फेरि गालिए ॥३॥

पुराना वाद हुन् झ्याउ, हाम्रो वाद त च्याउ हो ।
चन्द्रमा दाहिना बन्ने, हाम्रो सिद्धान्त ढ्याउ हो ॥
पुतली नाचमा घुम्दै, गरौँ गजब नट्खट ।
डग्मगिन्न यहाँ सत्ता, कोही गर्दैन गड्बड ॥४॥

जिन्दावाद भनौँ आऊ, क्रान्तिका वीर-सारथि ।
उनैका स्तुति वा भक्ति, भजेरै गर आरती ॥
लम्पसार नयाँ वाद, हाम्रै मगज-सूत्र हुन् ।
रोध-विरोधका शक्ति, कामी र पश्चगामी हुन् ॥५॥

सबै चिन्तन हुन् चिन्ता पीडा दुःख र उल्झन ।
लम्पसार नयाँ वाद मोजको गर्छ गुन्जन ॥
आयात गर कुर्कुस्त, निर्यात शून्यमा झरोस् ।
लम्पसार नयाँ वाद आजको नव दृष्टि होस् ?? ६॥

०००
धादिङ ।