दुष्यन्त भट्टराईकमरेडकाे शपथ
सायद उनले कम्युनिस्ट मेनिफेस्टाे पढेकै छैनन्
कमरेड
भरखरै शपथ लिएर फर्केका छन्
उनलाई
केन्द्रीय महाधिवेशनकाे
प्रतिनिधि बन्ने चिट्ठा पर्याे
गौरवशाली पार्टीकाे
केन्द्रीय सदस्य बन्ने
अवसर पनि मिल्यो यसपालि ।
अब उनी
उहाँ कमरेड भएका छन्
पशुपतिनाथकाे पटकपटक दर्शन
देवीस्तुतिकाे साँझ बिहान वाचन
हनुमान चालीसाकाे साधना
अहिले सार्थक भएको छ उनको ।
यतिखेर
मलाई साेध्न मन छ
केही प्रश्न कमरेडसँग
सायद
उनले कम्युनिस्ट मेनिफेस्टाे
पढेकै छैनन्
पढेका छैनन् मात्रै कहाँ हाे र?
कस्तो छ मेनिफेस्टाे?
देखेकै छैनन्
के हो मेनिफेस्टाे ?
बुझेकै छैनन् ।
के हो लालसलामकाे रहस्य ?
मुट्ठी कसेर दाहिने हात
किन उठाइन्छ माथि?
उनलाई थाहा छैन
तर पनि उनी
उहाँ भएका छन्
अर्थात् गौरवशाली पार्टीको
केन्द्रीय सदस्य भएका छन् ।
उनीसँग
यी सरल र ज्वलन्त प्रश्नहरू पनि गर्नु छ मैले
मार्क्सकाे पूरा नाम के हो ?
स्टालिन किन तानाशाह मानिए ?
किन राखिएको छ
माओकाे शव सुरक्षित ?
किन ढालियाे
लेनिनको सालिक गर्ल्याम्म ?
किन साेभियत सङ्घकाे नक्सा
टुक्राटुक्रा भयाे ?
कसले भत्कायाे
बर्लिनकाे पर्खाल एकाएक?
गाेर्भाचाेभ
कसरी बिक्याे रातारात ?
काे हुन् –
हो चि मिन्ह, किम इल सुङ र फिडेल क्यास्ट्राे ?
किन थुनियाे
गाेन्जालाेलाई पिन्जरामा ?
पुष्पलाललाई
हिजो किन गद्दार भने ?
किन खसालियाे
मदन भण्डारीलाई दासढुङ्गाबाट ?
किन सुरु गरे
प्रचण्डले छापामार जनयुद्ध ?
के गर्दै छन् अहिले
माेहनविक्रम सिंह ?
किन भन्दै छन्
कार्यकर्ताहरू
के. पी. ओलीलाई बा ?
किन गलहत्याइए
माधव आफैंले बनाएको घरबाट ?
किन विपथनकाे बाटाे राेजे
बाबुराम भट्टराईले ?
अब अन्तिम प्रश्न
यसरी साेध्न मन लाग्यो –
कमरेड !
तपाईंले पार्टीको सदस्यता
कहिले काेसँग लिनुभएकाे थियोे ?
