नेपाली हास्यव्यङ्ग्य अनलाइन पत्रिका

चर्दछौ दुःखीको बाली लाग्छौ तस्करकै पछी
गर्दैनौ काम कुर्लन्छौ चोकमा थुतुनो धसी ।
असत्ती लोभि पापीकोसँग मात्र छ लसपस,
को हौ भन नढाँटेर साँढे हौ यात सांसद ?

भइँ खोस्रेर डुक्रिन्छौ, आपसमा जुध्न जान्दछौं,
नाङ्गो छौ शर्म मान्दैनौ पुर्खाको लाज फाल्दछौं
घाँस खान सबै मिल्छौ चर्छौ देशै सपासप,
कौ हो भन नढाँटेर साँढे हौ या त सांसद ?

पिएर पसिना झुत्रे श्रमकर्मी निमेकीको
नपुगेर अझै चाट्छौ जुठा प्लेट छिमेकीको
मलमूत्रादिका थैला बेकामे भोगलम्पट
को हौ भन नढाँटेर साँढे हौ या त सांसद ?

बुझ्रछाै लाखाैं तलवभत्ता खाली छन् कुर्सी ता सबै
विकासे कोष भन्दैमा करोडौं माग्दछौ अझै
अगस्ती हौ कि हूँडार, हौ डाइनोसर मम्मथ
को हौ भन नढाँटेर साँढे हौ या त सांसद ?

खुट्टा छामेर गर्दैछौ बढाइँ त्यो छिमेकीको
हड्डी चाटेर भन्दैछौ तावेदार हुँ स्वामीको
जस्केला ढुकि पस्रन्छौ खुस्रक्क प्रभुका पद
को हौ भन नढाँटेर साँढे हौ या त सांसद ?

कतै झुक्छौ, कतै भुक्छौ पालो फेरो यताउता
तिमी आबाद छौ बाँकी बरबाद जतातता ।
पराल नल भो देश, टिप्यौ दाना टपाटप
को हौ भन नढाँटेर साँढे हौ या त सांसद ?

०००

नयाँ वानेश्वर ९८४१६४७१८९