नेपाली हास्यव्यङ्ग्य अनलाइन पत्रिका

मिल्छ ?
मिल्दैन ।
मिल्दैन ?
मिल्छ ।
किन मिल्नु हौ ?
हैन मिल्नै पर्छ नि ।
किन नमिलेका नि ?
मिल्न त हुन्न नि ।
अब मिल्ने ठाउँ सकिएकै हो त ?
हैन मिल्ने ठाउँ त बाँकी भैहाल्छन् नि ।
मिल्ने ठाउँ के बाँकी छ र ?
अब त मिल्ने ठाउँ सकिए क्यारे ।
उ ः मिल्ला मिल्ला जस्तो छ ।
हैन अब त नमिल्ने भो अरे ।
ठिक भो मिल्नु हुँदै हुँदैन ।
हैन मिल्नु पथ्र्यो नि ।
आफ्नै सरकार ढाल्नेसँग कसरी मिलुन् ?
आफ्नै सरकारमा नराख्नेसँग कसरी मिलुन् ?
हामी विकास विरोधीसँग मिल्न सक्दैनौँ ।
हामी पनि प्रतिगामीसँग मिल्न सक्दैनौँ ।
उनीहरू दक्षिणपन्थी हुन् ।
उनीहरू उत्तरपन्थी हुन् ।
हाम्रो योगदानले बनेको पार्टी हो यो ।
हैन हाम्रोचाहिँ योगदानले बनेको पार्टी हो ।
उनीहरू पद बाँड्नै चाहदैनन् ।
उनीहरू पदबिना बस्नै चाहदैनन् ।
त्यो अप्राकृतिक गठबन्धन हो ।
यो प्राकतिक गठबन्धन हो ।
अनि कसरी मिल्छ त ?
अर्कासँग त मिले
आफ्नासँग किन मिल्दैनन् त ।
तिनले हाम्रा खुट्टा ताने ।
तिनले हामलाई लात्ती हाने ।
अनि कसरी मिल्नु त ।
हामी सडकमा पुर्‍याइदिन्छौँ ।
हामी बार्दलीमा उभ्याइदिन्छौँ ।
हामी सरकारबाट गलत्याएर निकाल्छौँ ।
हामी जसरी पनि सरकार टिकाउँछौँ ।
मिल्छ ?
मिल्दैन ।
मिल्नै दिँदैनन् ।
मिलाउनै खोज्दैनन् ।
मिल्दा पदै पुग्दैनन् ।
मिल्दा कुर्सी नै खनिदैनन् ।
छिमेकीले नमिल् भनेका छन् रे ।
आफन्तले मिल्लास् भनेका छन् रे ।
कोही घरका छन्,
कोही घाटका छन्,
कोही घरका न घाटका छन्,
अनि कसरी पो मिल्छन् र ?
ए अब मिल्दैनन् त ?
उनीहरूले तिनीहरूलाई निकालेका हुन् ?
हैनन् तिनीहरू आफैँ निस्किएका हुन् ।
तिनीहरू आफैँ निस्किएका हुन् ?
हैन तिनीहरूलाई उनीहरूले निकालेका हुन् ।
अनि मिले अरे त ।
हैन हैन केही लेनदेन गर्न मिलेका हुन् ।
राष्ट्रिय देन गर्न मिलेका हैनन् ।
उनीहरू गद्दार हुन् ।
उनीहरू झन लालगद्दार हुन् ।
अनि कसरी मिल्छन् त ?
त्यही भएर त मिल्दैछन् त ।
हो त्यही भएर त मिल्दैनन् त ।
मिल्दा प्रभु रिसाउँछन् रे ।
मिल्दा भगवान् मान्दैनन् रे ।
मिल्दैनन् ?

000

जुरोपानी, झापा