नेपाली हास्यव्यङ्ग्य अनलाइन पत्रिका

प्रधानमन्त्रीज्यू ! हाम्रो फोहोर कहिले हट्छ ?
यो संघीय सरकारको काम होइन ।
मुख्यमन्त्रीज्यू ! हाम्रो फोहोर कहिले हट्छ ?
यो प्रदेश सरकारको काम होइन ?
मेयरज्यू ! हाम्रो फोहोर कहिले हट्छ ?
यो महानगरको काम होइन ।
वडाध्यक्षज्यू ! हाम्रो फोहोर कहिले हट्छ ?
हामीले त हटाउन खोजेकै हौँ ।
तर, फोहोरमा धेरै राजनीति पस्यो ।
फोहोर समस्या हैन, समस्या राजनीति हो ।
राजनीतिज्ञज्यू ! कति दिन राखेपछि,
फोहोर पनि राजनीति जस्तै मिठो बास्ना आउँछ ?
यो कुरा फोहोर गर्ने जनतालाई सोध्नुपर्छ ।
जनताज्यू ! कहिलेबाट यो फोहोर हट्छ ?
फोहोर हटाउँछु भनेर चुनाव जित्ने नेतालाई सोध्नुपर्छ ।
बल्ल थाहा भो ! हाम्रो फोहोर हाम्रो समस्या हैन ।
जोए बाएडेन्ज्यू !
नरेन्द्र मोदीज्यू !
सि जिङ पिनज्यू !
हाम्रो फोहोर कहिले हट्छ ?
जहाँ फोहोरभन्दा बढी
फोहोरका सरोकारवाला अधिकारी गनाउँछन् ।
त्यहाँ फोहोरको गन्ध आफैँ मन्द हुन्छ ।
फोहोर हटाएपछि
चुनावी नारा बन्द हुन्छ ।
त्यहाँ फोहोर किन हटाउनू ???

०००
जुरोपानी, झापा