नेपाली हास्यव्यङ्ग्य अनलाइन पत्रिका

जस्ले जे मन लाग्छ गर्छ सजिलै उद्दण्ड भन्ने किन
लाग्दैछन् अधिकार आज सबले खोसेर आफ्नो लिन ।
लागेको छ स्वतन्त्रता-खपतमा पूरा यहाँ मानव
आएको छ समस्त यो मुलुकमा यस्तो व्यवस्था अब ॥

सित्तैमा अधिकार मिल्दछ यहाँ कर्तव्य चाहिन्न है
भो शङ्कास्पद कर्मको फल सधैँ पाइन्छ-पाइन्न खै ।
बिर्सेको छ हरेकले जब सबै कर्तव्य आफ्नो यहाँ,
यस्तो उत्सवतुल्य जीवन अहो छाडेर जाऊँ कहाँ ॥

जस्ले गर्दछ राजनीति अहिले ठानिन्छ त्यो नैतिक
गर्ने मानिस जो समाजहित हो बिर्सन्छ उस्ले हित ।
भ्रष्टाचार गरेर बस्छ सहसा यो राष्ट्रको सेवक
ताली लेख्दछ खालि कागजभरी यो देशको लेखक ॥

आए चार प्रकारका मुलुकमा देख्यौँ प्रजातन्त्र ती
साह्रै गद्गद भावमा विषयमा लेख्यौँ प्रजातन्त्र ती ।
पानामात्र भरे, भरेन कहिल्यै मान्छे प्रजातन्त्रले
आयो स्वागत भो बनेन कहिल्यै मान्छे प्रजातन्त्रले ॥

यो छाडापन, तुच्छता, मनुजको उन्माद, स्वच्छन्दता,
आयो, मानवता गयो पर भयो यो देहको देवता ।
बोक्रो सुन्दर बाहिरी जलपले सौन्दर्यशाली छ यो
खोक्रो मानव-मुल्यको पतनमा कस्तो प्रजातन्त्र हो ॥

०००
देवघाट- ५, तनहूँ
सम्पर्कः ९८०२९९३९१३