नेपाली हास्यव्यङ्ग्य अनलाइन पत्रिका

नवीन देवकोटा :

बाँध्न खोज्यो, थुन्न खोज्यो, चिप्लिरहने मन
सुम्सुम्यायो, थप्थप्यायो, रोई-रोई जित्ने झन्
यो लोभी-पापी मन, यो लोभी-पापी मन !!

पच्चिस दिनमै झ्वाम्म हुन्छ एक महिनाको धन,
बाँकी पाँच दिन बरालिन्छ जागिरेको मन !
दाहिने-देब्रे कोल्टे फेर्छ, निदाउँदैन तन,
एका विहानै बूढीको गनगनः
“रातभरि बर्बर-बर्बर, गएर हाकिमलाई सिधै सोध्नु नि
कति छ उसको धन ?”
हरे लोभी मन !
यो लोभी-पापी मन, यो लोभी-पापी मन !!

फाट्या नाना, च्यात्या नाना, उस्तै उस्तै छन्
धन्य, प्वाल पर्‍या खल्ती आफ्नो कसैले देख्दैनन् !
नाना चिन्तन, अशान्त मन; नयन भौंतारिएछन्
वाई-जेनेरेशनको रियाक्सनः
“बूढो, खुरुखुरु बाटो लाग्ने अरुको तनमा
नडुलाउने नयन”
लौ सुनिस् पापी मन !
यो लोभी-पापी मन, यो लोभी-पापी मन !!

०००
सरस्वतीनगर, काठमाडौं
‘मनतरङ्ग’ कविता सङ्ग्रह (२०७७)