नेपाली हास्यव्यङ्ग्य अनलाइन पत्रिका

माधव पोखरेल गोज्याङ्ग्रे :

बिराला र मुसाहरू हात्ती घोडा चढेर
सयर गरिरहेको मेरो देशमा
कुखुराहरू कुकरमाथि सवार भएर
भेडाहरूको बैठकमा धाई रहेका छन् ।
कोही कोसेली पातमा अल्झिएका छन्
कोही सुँगुर चढेर स्वर्ग जाने बाटो खोजिरहेका छन्
कोही भेडाको बुई चढेर बैतरनी तर्न खोजिरहेका छन् ।
कोही गिद्धमाथि चढेर त कोही ब्वाँसोलाई मित्र बनाएर
घरभित्र बाहिर गर्दै नाटक गरिरहेका छन् ।
भनौँ यहाँ अनेक थरिको नाटक मञ्चन हुन्छ
हामीलाई हेर्ने इच्छा नहुँ नहुँदै पनि देखाइन्छ
बाध्यतामा फँसेका छौँ हामी कालाहरूको
कालचक्रमा फँस्न हिजोदेखि आजसम्म ।
परेवा र गौथलीको आवाज सुनिन छाडेको छ
काग, चिल, बाजहरू प्रत्येक गौडामा बसेर
शिकार खोजिरहेका छन् ।
सिंहले बाघको गालामा थप्पड हान्छ
बाघ निरीह भएर घुर्छ र गर्जन्छ
कलमको टुँडो भाँच्ने प्रयास गर्छ
कलमको शक्तिले आज आफू बाघ भएको विर्सन्छ
बेलामा लसुन र नून खान नपाउने भरिया पाल्छ
अनि वैदेशिक विमान स्थलमा परिचालन गर्छ ।
बाघलाई झापट हान्ने सिंह मौन छ
सायद बिरालाको साक्षी होला ऊ पनि
म कुटे जस्तो गर्छु तँ रोए जस्तो गर भनेर
नाटक गरेको हुन सक्छ हाम्रा अगाडि ।
खसी, बाख्राहरू, भैँसी चढेर यात्रा गरिरहेका छन
हाँसले पानीमा स्वतन्त्रता उपभोग गर्न पाएको छैन
परेवा गौथलीहरू शिकारीको डर त्रासले
चारो टिप्न छाडेका छन् ।
गोरु, साँढे र गाईहरू गोठ विहीन भएका छन् ।
गोठालाहरू चरनको अभावमा आत्महत्या गरिहेका छन् ।

०००
गाईघाट, उदयपुर