नेपाली हास्यव्यङ्ग्य अनलाइन पत्रिका

आर. आर. चौलागाईं :

हामी कहाँ हिँड्दै छौँ ?
हाम्रो बाटो कहाँ पुग्यो ?
हाम्रो लक्ष्य कति टाढा छ ?
हाम्रो लक्ष्य कति नजिक छ ?
फूलैफूलको संसार छ भन्थ्यौ
अमृत बग्ने नदी छ भन्थ्यौ
न्याय जोख्ने तराजु छ भन्थ्यौ
झलमल्ल बल्ने आँगन छ भन्थ्यौ
के तिम्रो संसार यही फोहर हो त ?
के तिम्रो अमृत यही पीप हो त ?
के तिम्रो न्याय यही नर्क हो त ?
के तिम्रो आँगन यही नाली हो त ?
एक घुट्को पानीमा तिमी रमायौ
एक टुक्रो रोटीमा तिमी लोभियौ
एक झुत्रो टालोमा तिमी हौसियौ
एक झुल्को पिलपिलमा तिमी हरायौ
के तिमीले अब हारेकै हो त ?
के तिमीले अब हतियार बिसाएकै हो त ?
के तिमीले अब हात उठाएकै हो त ?
के तिमीले हामीलाई झुक्क्याएकै हो त ?

०००
हेटाैँडा
२०८१ असार २८